Amaraso y’ubutwari bw’Abanyarwanda: Umuzi nkomoko w’impeta z’ubutwari (Igice cya mbere)

Ngabo Simeon

Byinshi tubona mu bikorwa by’ubutwari Abanyarwanda bafite ubu, ni isokomurage w’abakurambere mpangarwanda, kuko n’ubundi ‘Isuku igira isoko, umwanda ukagira akazu’’

Umurage w’ibikorwa byo mu mushinga wo kubaka u Rwanda, niwo wabaye igikabuzo cyo kurasa intego yo kugera ku bikorwa byinshi kandi byiza.

Nk’uko tubikesha igitabo “Intwari z’imbanza zubatse u Rwanda rugahamya igitinyiro’’ cyanditswe n’Umusizi Nsanzabera Jean de Dieu, umwanditsi w’Amateka n’inzobere ku muco n’ubuvanganzo, tugiye kubataturira amateka y’uruhererekane rw’impeta z’ubutwari mu Rwanda rwo hambere, zahaye imbaduko abanyarwanda bo muri ibyo bihe barushaho kwatanya bajya imbere besa imihigo.

Impeta z’ishimwe zahabwaga intwari ku rugamba, zifite ibirari bikuye kuri Ruganzu Ndoli ahasaga mu wa 1510.

Umwami w’u Rwanda, Ruganzu Ndoli ni we wagennye inzego z’Intwari bwa mbere mu mateka y’u Rwanda, anaca iteka rigena impeta z’ubutwari n’ibindi bagomba kugabana. Izo mpeta z’ubutwari, zatumaga abanyarwanda barushaho gushira amanga no kurwana ishyaka ryo kwikura mu bucakara bw’amahanga no kwigarurira ibihugu. Impeta zahabwaga Intwari uhereye ku ngoma ya Ruganzu Ndoli zirimo:

Umudende: Umudende yari impeta y’ubutwari yambikwaga Intwari yicaga ababisha barindwi ku rugamba, ibatsinze mu itsimbiro. Uwo mudende wari icyuma kimeze nk’umukwege bambaraga mu ijosi gitunzweho amashinjo (ibyuma bicuze nk’umuhunda ucuritse birimo amarebe nk’ayo mu nzogera).

Usibye kumwambika uwo mudende, yanahabwaga amashyo y’Inka, ubundi agatunga agatunganirwa. Impeta y’umudende ni imwe mu mpeta zagiraga imihango n’imiziririzo iruhije cyane.

Uwahawe umudende, yagombaga kuwubagira buri gihe, hakaba n’ibyo atagombaga kurya no kunywa. Impamvu ni uko ari yo mpeta y’ubutwari yatangwaga bwa mbere ku ntwari yivuganye ababisha ku rugamba, bityo uyihawe agasabwa guhirimbana kugeza ku munota wa nyuma akarwana inkundura ariko akora ibikorwa by’ubutwari bituma ava kuri iyo mpeta akajya ku yindi.

Yagombaga kuruhuka ari uko ageze ku mpeta y’ubutwari ikurikiyeho y’Impotore.

Impotore: Impotore ni impeta y’ubutwari yahabwaga umuntu wivuganye ababisha cyangwa abanyamahanga 14 abatsinze mu rukubo. Nyuma y’urugamba, yambikwaga umuringa usa n’amazi uzinze nk’inyabubiri akawambara ku kuboko kw’iburyo. Usibye kumwambika uwo muringa, yanahabwaga amashyo y’Inka, ubundi agatunga agatunganirwa.

Gucana uruti: Impeta y’ikirenga mu Rwanda rwo ha mbere yari iyo ‘Gucana uruti’. Iyo mpeta yahabwaga umuntu wishe ababisha 21 ku rugamba. Kugira ngo ayihabwe ibwami haberaga imihango ikomeye ikitabirwa n’umwami ubwe. Uwo muntu wacanye uruti, yabaga yubashywe cyane akanafatwa nk’Intwari y’ikirenga koko.

Yagabirwaga inka nyinshi n’imisozi yo gutegeka, agasonerwaga kujya ku rugamba, ahubwo akaba umutekereza n’umujyanama w’ibitero byo kwagura igihugu. Ibyo bikagaragazwa nuko yafataga icumu rye, akarishinga mu muriro igiti rikwikiyemo kigashya nk’ikimenyetso cy’uko asoje urugamba atazongera kurusubiraho, ari nayo yabaye inkomoko y’iryo zina.

Icyakora uwabaga yahawe ingororano zo gucana uruti yari afite amabwiriza akomeye agomba kubahiriza, kuko iyo yagororerwaga bene kariya kageni, ntabwo yongeraga guhura n’umwami yacaniyeho uruti ngo barebane amaso ku maso kugeza atanze, kuko nta bihanga bibiri mu nkono imwe, nta bihangange bibiri mu gihugu kimwe. N’imisozi yahabwaga gutwara akenshi yabaga iri kure y’ibwami nko ku mbibi z’u Rwanda n’ibindi bihugu.

Kubera izo ngororano zose, zaba izahawe Impotore, uwahawe Umudende, Uwacanye uruti, uwahawe Inka y’Umuheto n’uwahawe Inka y’Imirindi zatumaga Uwagize ubutwari abiratira abandi mu kivugo cyabimburiga kandi kikanasoza ikintu cyose avuze. Ibyo byatumaga umunyarwanda wese aharanira kuba Intwari bityo agashira ubwoba ku rugamba.

Usibye no kubaha impeta z’ubutwari, Ingabo zose zatsinze urugamba, zagabanaga iminyago, ugasanga urugo rufite Ingabo y’igihugu, arirwo rukomeye. Byatumye u Rwanda rubona abana benshi bagana mu itorero kugira ngo bigiremo ibyo kuba Intwari n’imyitozo njyarugamba. Nuko abitabira kuba Ingabo z’igihugu baba benshi u Rwanda rugira imitwe y’Ingabo myinshi, ku buryo byakangaranyije amahanga aruzengurutse.

Gutanga impeta z’ishimwe byatumye u Rwanda rubona abana benshi bagana mu itorero kugira ngo bigiremo ibyo kuba Intwari n’imyitozo njyarugamba

src: igihe

Leave a Reply

Your email address will not be published. Required fields are marked *

Next Post

Amazina y’ahantu akomora inyito ku ihangwa ry’igihugu (Igice cya mbere)

Abatekereza b’amateka y’u Rwanda bakunze gusizanira cyane ku nkomoko y’inyito y’ahantu aha n’aha, bamwe bakabivuga uko babizi abandi bakabishingaho agati batabinonosoye neza. Nk’uko tubikesha igitabo “Intwari z’Imbanza zubatse u Rwanda rugahamya igitinyiro” cy’Umusizi Nsanzabera Jean de Dieu, tugiye kubasesengurira byimazeyo ububiko bw’amateka y’u Rwanda, bugaragarira mu mazina y’inyito y’ahantu byakozwe […]