Abana bari bafungiwe muri Gereza bahawe imbabazi na Perezida Kagame nyuma yo gutsinda Ikizamini cya Leta neza -Amafoto

Ashingiye ku bubasha ahabwa n’amategeko kuri uyu wa Gatatu tariki ya 16 Mutarama 2019, Perezida Kagame yahaye imbabazi abana 16 barimo abakobwa batatu, bari bafungiye muri Gereza ya Nyagatare batsinze ibizamini bya Leta bisoza amashuri abanza n’ay’icyiciro rusange.

Aba bana bahawe imbabazi bari bafungiye ibyaha bitandukanye birimo gufata ku ngufu, gusambanya umwana, gutunda no gukoresha ibiyobyabwenge n’iterabwoba.

Muri aba bana, umukuru ubarimo yavutse mu 1998 mu gihe umuto ari uwo mu 2003. Mu bakoze ikizamini mu mashuri abanza, bane baje mu cyiciro cya mbere nk’abatsinze neza abandi umunani baboneka mu cyiciro cya kabiri.

Muri bane bakoze ikizamini cy’icyiciro rusange, umwe yaje mu cyiciro cya mbere abandi batatu batsindira mu cyiciro cya kabiri.

Amanota y’ibizamini by’aba bana.

Biteganyijwe uko kuri uyu wa Kane tariki ya 17 Mutarama 2019 ari bwo bari bufungurwe mu muhango uzabera kuri Gereza ya Nyagatare, bagakomeza amasomo yabo mu mashuri asanzwe.

Uretse kuba aba bana bari barahize kuzatura intsinzi Perezida wabahaye amahirwe yo kwiga si ubwa mbere hakozwe iki gikorwa kuko n’umwaka ushize na bwo Perezida Kagame yahaye imbabazi abana 18 bakoze ibizamini bisoza amashuri abanza n’icyiciro rusange bagatsinda neza.

Mu bana b’abahungu 15 n’umukobwa umwe barangije amashuri abanza, umunani baje mu cyiciro cya mbere cy’abatsinze neza mu gihugu; barindwi baza mu cya kabiri na ho undi aza mu cya gatatu.

Naho mu bana batanu bakoze ikizamini gisoza icyiciro rusange, umwe yaje mu cyiciro cya mbere; babiri mu cya kabiri na ho abandi babiri baza mu cya kane.

Leave a Reply

Your email address will not be published. Required fields are marked *