Mw’ishirahamwe AFEPV baraye bemeje integuro nshasha irimwo ibikorwa bitegekanijwe kuzorangurwa mu myaka itanu irimbere(2025-2029)
Kuri uyu wa gatatu igenekerezo rya 22 Nzero ishirahamwe AFEPV muvyo rijejwe harimwo gukingira agateka k’abana hamwe no gushigikira abatishoboye ryaratunganije uruganda rwo kwemeza integuro y’ibikorwa bitegekanijwe kurangurwa n’iryo shirahamwe mu myaka 5 irimbere(2025-2029).
Nk’uko bishikirizwa na Olivier_Gacuti arongoye igisata c’intunganyo y’imigambi muri AFEPV, iryo shirahamwe risanzwe rikorera mu ntara zitari nke riramaze gukora ibikorwa bitari bike harimwo nko Gushinga amashure atatu y’akarorero (ENR) atanga ubumenyi bw’akanovera (tubamenyesha ko Ayo mashure aza muri 10 yambere mu kumenyesha mu kibazo ca reta co mumwaka 9 Ku gwego gw’igihugu), gusubiza mw’ishure abana 147, kwegeranya no gushira mu miryango mirezi abana baba mw’ibarabara, gufasha kwandikisha mu bitabu ndangamuntu abana batanditswe, kuronsa abashingwamanza ku buntu Abana bakeneye abababuranira, kuronsa imitahe no guherekeza imigambi y’abakenyezi ba ntaho nikora,…
Méthode HAKIZIMANA umuhinga mu bijanye no gushiraho intunganyo nk’izo (plan stratégiques) ariko arasigura ivyo bikorwa akaba yarerekanye ibisata 4 bikurubikuru iryo shirahamwe rizoshimikirako, aho twovuga nko guterera mu gisata c’indero hamwe no gukingira agateka k’abana ; Gufata mu mugongo abakenyezi mu bikorwa vy’iterambere, Guteza imbere umubano mwiza, n’igisata c’ubuvugizi no kumenyesha amakuru.
Umuhanuzi wa musitanteri muha muvyo ajejwe harimwo ikibano akaba yarakeje cane iryo shirahamwe kubw’iyo ntambwe bateye yo gushobora gushiraho ibikorwa bitegekanijwe mu myaka 5 irimbere.
Jean Claude Nsabumuremyi aserukira iryo shirahamwe imbere y’amategeko akaba yarakengurukiye umuntu wese yashoboye kugira ico aterereye kugira ngo iyo ntunganyo ishirweho ndetse n’ingene bakorana n’intwaro haba mu ntara bakoreramwo ndetse no muriyo komine nyene ya Muha basanzwe bafisemwo icicaro gikuru.
